Nosotros los Madariaga

Los mios cuatro apellíos son: Andrés y Fernández, pela parte mio pá; Díaz y Madariaga, pela parte mio ma. En min amiéstense ramales familiares de l’Asturies central (Fernández, de Gozón), de l’Asturies oriental (Díaz, de Ribesella), de Castiella (Andrés, de Tierra de Campos) y del País Vascu (Madariaga, de Vizcaya).

Puede dicise que tolos Madariaga afincaos n’Asturies en xeneraciones, somos parientes en menor o mayor grau. Acordies cola lleenda familiar que cuntaba mio güela Rosario Madariaga y les mios tíes, un vizcaín de Markina, llamáu Mateo Madariaga Mendicuti, emigró na segunda metá del sieglu XIX a Asturies, atrayíu pol desarrollu de les llinies ferroviaries. Actividá empresarial de nun sé qué envergadura; non muncho, paezme. Ello ye llegó a arruinase nun negociu relacionáu col ferrocarril del Payares, entamáu pol que depués diba fundar el bancu Herrero, siempre según la lleenda familiar.

Los antecesores de mio güela Rosario debíen tener fresca l’acordanza de la patria vasca. Debíen ser euskaldunes clásicos, esto ye, falantes de vascu tovía non mui afectaos pola fola billingüizadora castellana. Circulen hestories de cómo pa narrar un cuentu daquién entamaba: «Bruja montado palo escoba…», y otres. Yo criéme sintiendo cuntar coses como estes desque yera pequeñín. Conforme van desapaeciendo los familiares, esta memoria familiar va diliéndose como l’orbayu nun fontán.

Va unos años, la mio muyer Beatriz y yo averémonos a Markina, a ver si, solo pol fechu de tar ellí, me llegaba’l retriñíu familiar d’aquellos Madariaga decimonónicos. Entremos nuna cafetería y entrugué-y al amu si conocía a daquién que s’apellidara Madariaga. «¡Madariaga me apellido yo, ahí va!», dixo tou arrechu.

El casu ye que l’apellíu Madariaga, con ser conocíu, nun ye de los más frecuentes de la onomástica eusquérica. Llevábalu Salvador de Madariaga, escritor y políticu lliberal republicanu, candidatu al Premiu Nobel de la Paz; Julen Madariaga, abogáu y ún de los fundadores de la Eta; o Javier Solana Madariaga, políticu socialista. Tamién lleva esi apellíu Beatriz Quirós Madariaga, destacada sindicalista ―yá xubilada― del Suatea, pero eso ye fácil d’esplicar: somos primos segundos. (Aprovecho pa unvia-y un saludu).

L’apellíu Madariaga básase nel topónimu del mesmu nome. En realidá, según el Nomenclátor Xeográficu Oficial del País Vascu, Madariaga ye’l nome de cuatro llugares, toos en Vizcaya: en Gatika, Berango, Mungia y Bermeo. De dalgún d’ellos procederá l’apellíu. Ye un topónimu basáu na palabra madari ‘pera’, col pluralizador / colectivu -aga; asina que vien a traducise como ‘peral’ o ‘perales’.

Celia, mio ma, apellidábase Díaz Madariaga, y lo mesmo les sos cuatro hermanes y dos hermanos. D’aende’l segundu apellíu de mio, Díaz. Hai un asuntu estadísticu, que supongo que tará estudiáu, y ye que, al da-y preferencia al apellíu del pá, y al perdese l’apellíu segundu de la ma, van multiplicándose una serie d’apellíos y van perdiéndose otros. Tengo observao que se pierden los apellíos más característicos y orixinales. Nel nuestru casu, l’apellíu Madariaga acabóse. Y eso que los de la mio familia en Llangréu yeren conocíos como «los Madariaga».

Va munchos años viénome la idea d’incorporar el Madariaga de dalguna manera, pero los apellíos compuestos con guión («Díaz-Madariaga», por exemplu) nun me gusten. Igual se podía camudar el Díaz pol Madariaga, pa que fuera visible. Pero camiento qu’implicaba munches xestiones burocrátiques y trayía más trestornos que ventayes, asina que nin lo miré. Agora ye tarde, claro.

Claro ye que si tengo que firmar daqué colos dos apellíos, naide me quita d’usar l’apellíu Madariaga, en cuentes de Díaz, siempre que seya de mou non oficial. Asina que si d’agora en delantre veis un escritu firmáu por Ramón d’Andrés Madariaga, esi soi yo. Porque soi un Madariaga. Madariagatar bat naizelako.