Va cincuenta años del atentáu a Carrero Blanco. Acuérdome perfectamente d’esti fechu. Tenía catorce años y facía’l quintu cursu nel institutu Xovellanos de Xixón. Daquella, al llegar al quintu cursu había qu’escoyer ente Lletres o Ciencies, y yo escoyí Lletres. Yéremos l’únicu grupu de quintu de Lletres, y ellí conociémonos una serie d’amigos que tovía güei, polo menos dellos, siguimos viéndonos: Alfredo Álvarez, Felipe Fernández, Ángel de la Calle, Ángel de Miguel Redondo, Juan Carlos Muñoz, Aniceto Rodríguez Villa, Ceferino Suárez, José Ramón Matilla, Senén Zapico, Gilberto García Buelga, Javier Alvargonzález o Juan Carlos García de Frutos, que yá nun ta ente nós. (Como se ve, toos rapazos, porque’l Xovellanos yera un institutu masculín. El femenín yera’l Doña Jimena). Ente los nuestros profesores taben Francisco Vizoso, Alejandro Mieres, Sara Suárez Solís, Paloma Uría, Luis Pardo o Isidro Fernández Rozada, por citar dalgunos.
L’atentáu foi a les 9 y media de la mañana, pero los medios de comunicación de la dictadura nun dieron la noticia hasta hores depués. Esi día yera ún de los últimos del añu antes de les vacaciones, pero la mañana trescurrió normal. Dafechamente normal.
Al salir pa contra les dos 2 de tarde, ruxíase que daqué pasara col presidente del gobiernu, Carrero Blanco, pero yeren noticies borrinoses.
Fui andando del institutu a mio casa, na calle Extremadura de Pumarín, y al entrar atopéme a mio ma y mio pá mui nerviosos y apegaos a la radio. En mio casa escuchábase tolos díes el noticieru en castellanu de la BBC de Londres y tamién el de Radio París, amás de la Pirenaica, Radio Moscú y otres emisores que daquella había qu’escuchar a escondíes. Si queríes informate, teníes que garrar eses emisores, porque los noticieros taben controlaos pol réxime: nenguna emisora de radio daba noticieros pola so cuenta, sinón que teníen que conectar col «parte» oficial de Radio Nacional. Acuérdome que mio pá taba blancu de la impresión. La BBC taba dando la noticia, pero los medios españoles tovía nun la difundieran, o polo menos non col detalle que cuntaben dende Londres.
Foi una conmoción, sobre manera pa toes aquelles persones que teníen daqué compromisu d’enfrentamientu contra la dictadura, como yera’l casu de mio pá. Nun se sabía qué podía pasar. Si nun m’acuerdo mal, per eses feches taba celebrándose’l «xuiciu 1001», contra un refileru de sindicalistes de les Comisiones Obreres, ente los que taben Marcelino Camacho, Nicolás Sartorius o l’asturianu Juan Muñiz «Juanín». Per aquellos díes había munches protestes clandestines contra esti xuiciu. Había peligru de que-yos fixeren daqué más que tenelos na cárcel pendientes de condenes gravísimes.
Cuando se supieron tolos detalles del atentáu a Carrero Blanco, tol mundu quedó plasmáu. Yera’l primer atentáu de la Eta fuera del País Vascu, y el terrorismu tovía nun yera’l gran problema que foi depués. L’audacia del atentáu dexónos a toos impresionaos, pero teníemos mieu de les posibles represalies.
Carrero Blanco yera’l primer xefe de gobiernu dende la guerra civil, porque esi cargu siempre lu exerciera’l propiu Franco, qu’axuntaba la condición de xefe del Estáu, xefe del gobiernu y cabezaleru de los exércitos. Cola so muerte, francíase’l plan de Franco de da-y continuidá segura a la dictadura. De toes maneres, esta tovía duró dos años más. Nesos dos años a Franco dio-y vagar pa matar a Puig Antich y a dellos militantes de los grupos armaos Eta y Frap.
El poder taba ocupáu pola ultraderecha qu’emplegaba la violencia desque terminada la guerra civil qu’ellos mesmos provocaron. Contra’l terrorismu d’ultraderecha nel poder, actuaba un terrorismu d’ultraesquierda. Lóxicamente, aquel ambiente políticu nun tenía nada que ver col actual. Lleva xera treslladase col recuerdu a aquellos díes pa revivir aquellos fechos.
Va cincuenta años.
Ver insights y anuncios
Todas las reacciones:
1818
El Miradoriu | Ramón d'Andrés 