[Alvertimientu.- Si los catalanes nel fondu te repunen y Puigdemont te da voltures, quítate de lleer esti escritu].
Soi partidariu de la Llei d’Amnistía. Apóyola y sofítola dende’l principiu. Y dígovos por qué.
El Gobiernu razona que la Llei d’Amnistía ye una ferramienta pa la convivencia. Nun niego yo que pueda tener esi efectu. Pero’l mio apoyu nun ye porque seya una ferramienta de convivencia (meyor que lo seya), sinón porque ye xusta y democrática.
Yo apoyo l’amnistía porque en realidá los políticos independentistes catalanes nun cometieron esos delitos tan tremendos que la xusticia española-yos atribúi. Munchos xuristes ―tan sabios y prestixosos como los que dicen otres coses― afirmen que’l mayor delitu que pudieron cometer ye’l de desobediencia, y poco más.
¿En qué sofito esta opinión? Nuna cosa mui simple: lo que la xusticia española tipifica como delitos pergraves, la xusticia europea nun lo ve per nengún llau. Por eso los xueces españoles nun fueron quien a estraditar a Puigdemont y los sos: porque n’Europa los sos argumentos xurídicos son puru fumu.
Cuando unos políticos independentistes se punxeron a tiru directu de la xusticia española, cayéron-yos unes acusaciones terrorífiques, que pintaron los socesos del 2017 como un golpe d’Estáu onde apeligró la democracia y l’Estáu de derechu. Pero cuando otros políticos independentistes se punxeron baxo l’abellugu de la xusticia europea, viose que tol relatu tremendista de la xusticia española yera borrín. Namás que borrín.
Cuando ún mira’l procedimientu británicu n’Escocia y el canadiense nel Quebec, y compara col procedimientu español en Cataluña, entra un migayu vergüenza.
¿Daquién me puede esplicar por qué la xusticia española nun pudo estraditar a Puigdemont y los sos collacios? La respuesta ye fácil: porque esos tremendos delitos nun existen más que nel marcu d’una xusticia española ideoloxizada que tien la defensa de la Unidá d’España como un principiu divín inamovible que ta penriba de les voluntaes ciudadanes democráticamente espresaes.
Nin hebo golpe d’Estáu, nin la democracia nin l’Estáu de derechu tuvieron en peligru. L’Estáu, col so aparatu llegal, desactivó la declaración d’independencia al minutu de producise. Naide exerció nenguna independencia que nun ocurrió. Naide se llevantó escontra l’Estáu. Nenguna democracia tevo en peligru.
(Lleéi, por favor, a José Antonio Martín Pallín nel so llibru «El gobierno de las togas» o a Jorge Cagiao Conde nel so llibru «Patriotas con toga. Un estudio sobre el nacionalismu jurídico». Dos personalidaes nel mundu del derechu).
Apoyo la Llei d’Amnistía porque me paez xusta y democrática.
Acabóse la cacería escolforiada d’independentistes catalanes, adobada con demenciales acusaciones de terrorismu y conexones ruses sacaes de la manga. Esto ye una democracia. Que se sienten a la mesa y negocien políticamente tolo qu’heba que negociar. La democracia y la voluntá política negociada ta penriba de los conceptos inamovibles.
El Miradoriu | Ramón d'Andrés 